Benqueridas familias:

 

 

O mes de setembro despide o descanso do verán, dálle a benvida ao curso escolar e disponnos para o inicio da catequese.

 

O COVID 19 mudou os costumes e transformou o xeito cotiá de facer as cousas. Na parroquia somos sensibles a esta problemática e adaptámonos á nova situación.

 

En relación á catequese parroquial deste curso comunicamos que o prazo de inscrición remata o día 30 de setembro. Deberán anotarse todos os nenos de comuñón e confirmación, os que asistiron o curso pasado e os que comecen por vez primeira.

 

Cómpre lembrar que a celebración da Eucaristía é insubstituíbel como vivencia comunitaria da fe. Sen a participación na celebración dominical non hai catequese. A Misa vai introducíndonos paseniño na contemplación do misterio de Deus e  incorpóranos á participación plena na comunidade cristiá. Na parroquia desfrutamos dun gran espazo físico que nos permite vivir con alegría e seguridade a festa do Domingo. Aquí vos esperamos! A misa das familias ás 11h todos os Domingos.

 

Para concretar algúns aspectos da catequese dentro desta "nova normalidade" necesitamos saber o número de familias interesadas en recibir catequese. Unha vez anotados os nenos faremos unha proposta de acompañamento neste proceso de maduración na fe. Seguindo as recomendacións das autoridades sanitarias renunciamos ás reunións semanais  por grupos de nenos tal e como se viña facendo deica agora.

 

É necesario que cubrades o formulario para a protección de datos. Non esquezades darnos o correo electrónico e un teléfono móbil.

 

As fichas de inscrición quedan na páxina santoantoniodepadua.es, amais, deixaremos algunha ficha en papel ao fondo da igrexa. Para entregar estes impresos de solicitude empregade o buzón parroquial ou o correo electrónico Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.  

 

 

Dende a parroquia desexamos que todo transcorra con normalidade e sen sobresaltos.  

 

 

CATEQUESE PREPARACIÓN PRIMEIRAS COMUÑÓNS

Recomendamos aos nenos que están no primeiro ano de catequese que traballen o núcleo 5, temas 19 ao 23.

Os nenos que se preparan para facer este ano a primeira comuñón é moi importante que traballen os núcleos 3 e 4 onde atoparán todos os temas relacionados cos sacramentos da Reconciliación e da Eucaristía. Na dirección que se indica hai variedade de propostas, unha delas chamada “Misalito”, que recomendo especialmente.

Lembrade de practicar as oracións: Sinal de Cruz, Nosopai, Avemaría, Gloria, Credo.

Neste dirección (https://www.arguments.es/) ofrécense catequeses interactivas. Tedes, polo tanto, os temas expostos de maneira sinxela para que poidades dende a casa manter vivo o interese dos nenos, seguir o ritmo da preparación e non esquecer que está cerca o momento de encontrarse con Xesús.

Dende o luns día 11 retomamos a celebración da eucaristía.

Os Domingos ás 11:00h misa de nenos. En todo momento intentaremos cumprir as medidas de prevención de contaxios.

ACTIVIDADES CATEQUESE

Os traballos realizados enviádeos ao teléfono 698 139 530 (María)

Xoves Santo. FACER DENDE O CORAZÓN.

Xesús deunos unha lección grande e fermosa de amor. El convida aos amigos a unha cea de despedida, baixase a lavar os pés dos seus discípulos, con emoción e tristura despídese dos seus e, finalmente, fai entrega de si para que o teñamos sempre no noso acordo.

A proposta para este día consiste en facer un corazón. Un corazón grande e fermoso, e nel escribir por un lado os nomes das persoas máis queridas e, polo outro, por o nome de Xesús.

Para rematar, ese corazón pódese colocar nalgún recuncho da casa e envialo, como foto de whatsapp, a algunha persoa especial.

 

Venres Santo. AO PÉ DA CRUZ

Este día adoramos a cruz como símbolo cristián de salvación. Xesús morreu nunha cruz e resucitou.  Dende aquela as nosas cruces e mortes, unidas a de Cristo, conducen á salvación.

A proposta para este día é lembrar a todos os que sofren o Coronavirus e escribir unha oración pedindo por eles, para que recuperen a saúde e se sintan acompañados de todos. Cando remates de escribir ao lado do papel coloca unha cruz que teñas na casa e fai unha foto. Mira que se poida ler o texto.

 

Pascua de resurrección. MIRAR AO CEO CON ALEGRÍA

Este é o día máis claro, con máis luz, de todo o ano. Resucitou o Señor! Alegría que bota por fora. A nosa vida e a nosa fe nacen nun día coma este. Damos gracias e reloucamos porque temos VIDA.

A proposta consiste en colocar no exterior das casas, nunha fiestra, balcón ou terraza unha saba ou tela branca que representa os veos que cubriron a cara e corpo de Xesús e, logo da resurrección, quedaron envoltos no lugar da sepultura. Unha tela branca con “R”  de cartolina ou pintada, “R” de RESUCITOU e de RESISTIRÉ.

Por favor, de todo o proceso e do que vos gustara máis enviade fotografías.

As primeiras comuñóns é tradicional que se celebren  a partires de maio. Temos este ano un impedimento de forza maior, a pandemia do coronavirus. Agora é tempo de combater a enfermidade.

Para as nosas comunidades non representan unha urxencia as celebracións de comuñóns, confirmacións e mesmo bautismo (excepto en perigo de morte). O prioritario é recuperar paulatinamente a normalidade.

Decisión unánime e prudencial será pospoñer a partires de setembro este tipo de festas litúrxicas.

Temos que pensar en superar con garantías o risco de contaxio que non vai suceder repentinamente. Agardamos a que as autoridades sanitarias nos confirmen á volta á normalidade e a superación do perigo de contaxio. Deberemos respectar en cada momento a normativa das autoridades: concentración de persoas, distancias de seguridade, etc.

Recordar tamén que a catequese interrompeuse en marzo e a formación non chegou a completarse. Nas vosas casas podedes traballar co catecismo e compartir momentos de oración en familia. Recomendamos a páxina web das Delegacións de Catequese de Galicia e na da parroquia colgaremos algunha actividade.

O equipo de catequistas concretará as datas e organizará as celebracións tendo en conta, na medida do posible, as preferencias dos pais.

Unha última consideración. Pensemos todos no verdadeiro sentido da celebración da nosa fe. Moitas veces facemos unha convocatoria multitudinaria e un importante dispendio económico. As nosas celebracións non deben ser alleas ás circunstancias que nos rodean. Nos vindeiros días e meses para expresar o noso compromiso como igrexa recomendamos actuar con moderación, e colaborar con aquelas iniciativas que dende as parroquias buscan axudar aos máis afectados pola crise do COVID 19.

Un saúdo.